ᓄᓇᕗᑦ ᒐᕙᒪᖓᑕ ᓄᖑᔪᐃᑦᑐᒧᑦ ᐊᑐᐊᒐᕐᓄᑦ ᐅᖃᐅᓯᕆᓯᒪᔭᖓᑦ
ᓄᓇᕗᑦ ᒐᕙᒪᖓᑦ ᐃᓱᒪᒋᔭᖃᖅᐳᖅ ᐅᔭᕋᖕᓂᐊᕐᓂᕐᒥᒃ ᐱᒻᒪᕆᐅᑎᖦᖢᒍ ᐱᕝᕕᐅᑐᐃᓐᓇᕆᐊᖃᖅᐸᒃᖢᓂ ᑮᓇᐅᔭᓂᒃ ᐊᖑᒻᒪᑎᔪᒪᓂᕐᒧᑦ ᐱᔭᐅᔭᕆᐊᖃᖅᐸᒃᑐᓄᑦ ᓄᓇᕗᒻᒥᐅᑦ ᐅᓄᖅᓯᕙᓪᓕᐊᓂᖏᓐᓄᑦ ᐃᖅᑲᓇᐃᔭᕐᕕᐅᓕᑐᐃᓐᓇᕆᐊᖃᖅᐸᖕᓂᖓᓄᓪᓗ ᐊᒃᑐᐊᓂᓕᖕᓄᓪᓗ ᐊᔪᕈᓐᓃᖅᑕᐅᕙᒃᑐᓄᑦ ᐱᕙᓪᓕᐊᓂᕆᔭᐅᓇᔭᖅᑐᒥᒃ ᓄᓇᕗᒻᒥᐅᓄᑦ.
ᓄᓇᕗᑦ ᒐᕙᒪᖓ ᐃᓕᓴᖅᓯᕗᖅ ᓄᖑᔪᐃᑦᑐᖅᓯᐅᕐᓂᖅ ᓄᖑᔪᐃᑦᑐᒥᒡᓗ ᐅᔭᕋᖕᓂᐊᕐᓂᖅ ᐱᑕᖃᓕᖅᑎᑦᑎᕙᖕᓂᖓᓂᒃ ᐱᑐᐃᓐᓴᐅᙱᑦᑐᓂᒃ ᑲᒪᒋᔭᐅᔭᕆᐊᓕᖕᓂᒃ ᒐᕙᒪᒃᑯᓐᓂᑦ ᑕᒪᓐᓇ ᓄᖑᔪᐃᑦᑐᖅ ᖃᓄᕆᑦᑑᓂᖓ ᐱᔾᔪᑕᐅᓪᓗᓂ ᑕᐃᒪᐃᑦᑐᒥᙶᕈᓐᓇᓕᖅᐸᒃᑐᓄᓪᓗ, ᑭᖑᓂᑦᑎᓐᓂ ᐊᑐᖅᑕᐅᖃᑦᑕᕐᓂᑰᓂᖓᓄᑦ ᑕᒪᐃᓐᓄᑦ ᐅᓇᑕᐅᑕᐅᙱᑦᑐᓄᑦ ᐅᓇᑕᐅᑕᐅᕙᒃᑐᓄᓪᓗ ᐱᔾᔪᑕᐅᓕᖅᐸᒃᖢᓂ, ᖁᐊᖅᓵᕐᓇᕈᓐᓇᑐᐃᓐᓇᕆᐊᖃᕐᓂᖓᓄᓪᓗ ᐃᓄᐃᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᐊᕙᑎᒧᓪᓗ.
ᓄᓇᕗᑦ ᒐᕙᒪᖓ ᐃᓕᓴᖅᓯᕗᖅ ᖃᓄᐃᓕᐅᕐᕕᖃᕈᓐᓇᕐᓂᖏᓐᓂᒃ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔨᖏᓐᓂᒃ ᓄᓇᕗᒻᒥᓗ ᐃᒪᓕᕆᓂᕐᒧᑦ ᑲᑎᒪᔨᖏᑦ ᑖᒃᑯᐊᒃ ᐋᖅᑭᒃᓯᒪᓕᖅᑎᑕᐅᓚᐅᖅᓯᒪᑎᓪᓗᒋᑦ ᓄᓇᕗᒻᒥᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑕᐅᓯᒪᔪᒥᑦ ᐊᐅᓚᑦᑎᕝᕕᖃᕋᔭᕐᓂᕐᒧᑦ ᓄᖑᔪᐃᑦᑐᖅᓯᐅᕐᓂᕐᒥᒃ ᓄᖑᔪᐃᑦᑐᒥᒡᓗ ᐅᔭᕋᖕᓂᐊᕐᓂᕐᒥᒃ.
ᓄᓇᕗᑦ ᒐᕙᒪᖓ ᐃᓕᓴᖅᓯᕗᑦ ᑕᒪᓐᓇ ᓄᖑᔪᐃᑦᑐᖅ ᐱᓕᕆᕝᕕᐅᔭᕆᐊᖃᖅᐸᖕᓂᖓᓂᒃ ᓄᓇᕐᔪᐊᓕᒫᒥ ᐊᖏᖃᑎᒌᒍᑎᓄᑦ ᑲᓇᑕᓕᒫᒥᓗ ᐱᖁᔭᕐᓄᑦ. ᓄᓇᕗᑦ ᒐᕙᒪᖓ ᐃᑲᔪᖅᑐᐃᕗᖅ ᖃᓄᐃᓕᐅᖅᑎᐅᑎᑕᐅᓂᖏᓐᓂᒃ ᑲᒪᒋᔭᒃᓴᖃᖅᑎᑕᐅᓂᖏᓐᓂᒡᓗ ᑲᓇᑕᒥᐅᑦ ᓄᖑᔪᐃᑦᑐᒧᑦ ᖁᐊᖅᓵᕐᓇᖅᑎᑦᑎᑦᑕᐃᓕᒪᓂᕐᒧᑦ ᑲᒥᓴᒋᔭᖓᓂᒃ.
ᓄᓇᕗᑦ ᒐᕙᒪᖓ ᐱᕕᒃᓴᖃᓕᕈᓂ ᑐᓴᖅᑎᑦᑎᓂᕐᒥᒃ ᖃᓄᐃᓕᖓᓂᕐᒥᓄᑦ ᐱᑐᐃᓐᓇᐅᙱᑦᑐᒧᑦ ᓄᖑᔪᐃᑦᑐᒥᒃ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᖑᔪᒥᒃ, ᑕᒪᓐᓇ ᖃᓄᐃᓕᖓᓂᖓᑦ ᑕᓯᐅᖅᑕᐅᓂᐊᖅᐳᖅ ᓄᓇᕗᑦ ᒐᕙᒪᖓᑕ ᓄᖑᔪᐃᑦᑐᖅᓯᐅᕐᓂᕐᒧᑦ ᐅᔭᕋᕐᓂᐊᕐᓂᕐᒧᓪᓗ ᒪᓕᒃᑕᐅᔭᕆᐊᖃᖅᐸᒃᑐᓂᒃ ᓴᖅᑭᑎᑕᐅᓯᒪᔪᓂᑦ ᐊᑖᓂ.
ᓄᓇᕗᑦ ᒐᕙᒪᖓ ᐃᑲᔪᖅᑐᐃᓂᐊᖅᐳᑦ ᕿᓂᕐᓂᕐᒥᒃ ᐅᔭᕋᖕᓂᐊᕐᓂᕐᒥᒡᓗ ᓄᖑᔪᐃᑦᑐᒥᒃ ᒪᓕᒃᑐᖃᕆᐊᖃᖅᖢᓂ ᐅᑯᓂᖓ ᒪᓕᒃᑕᐅᔭᕆᐊᖃᖅᐸᒃᑐᓂᒃ:
- ᓄᖑᔪᐃᑦᑐᖅ ᐅᔭᕋᖕᓂᐊᖅᑕᐅᔪᖅ ᓄᓇᕗᒻᒥ ᐊᑐᖅᑕᐅᖃᑦᑕᕐᓂᐊᖅᐳᖅ ᐅᓇᑕᕐᓂᐅᙱᑦᑐᓄᑦ ᐊᕙᑎᒧᓪᓗ ᑲᒪᑦᑎᐊᕈᓐᓇᕐᓂᕐᒧᑦ ᐊᑐᖅᑕᐅᕙᒃᑐᓄᑦ.
- ᓄᓇᕗᒻᒥᐅᑦ ᐱᕐᔪᐊᖑᖃᑕᐅᓛᖑᔭᕆᐊᖃᖅᐳᑦ ᓄᖑᔪᐃᑦᑐᖅᓯᐅᕐᓂᕐᒥ ᐅᔭᕋᖕᓂᐊᕐᓂᕐᒧᓪᓗ ᐱᓕᕆᐊᖑᔪᓂ.
- ᖃᓄᐃᙱᑦᑎᐊᕈᓐᓇᕐᓂᖏᑦ ᖁᐊᖅᓵᕐᓇᖅᑐᒦᙱᓐᓂᖏᓪᓗ ᐃᖅᑲᓇᐃᔭᖅᑏᑦ ᐱᓕᕆᖃᑕᐅᕙᒃᑐᑦ ᓄᖑᔪᐃᑦᑐᖅᓯᐅᕐᓂᕐᒥ ᐅᔭᕋᖕᓂᐊᕐᓂᕐᒥᓗ ᑕᒪᕐᒥᑦᑎᐊᕐᓗ ᓄᓇᕗᒻᒥᐅᑦ ᓴᐳᔾᔭᐅᓯᒪᖃᑦᑕᕐᓂᐊᖅᐳᑦ ᑲᓇᑕᓕᒫᒥ ᒪᓕᒃᑕᐅᔭᕆᐊᖃᖅᐸᒃᑐᑎᒍᑦ.
- ᐊᕙᑎᒧᑦ ᒪᓕᒃᑕᐅᔭᕆᐊᖃᖅᐸᒃᑐᑦ ᑕᐃᒪᐃᓪᓚᑦᑖᖅᑎᑕᐅᔭᕆᐊᖃᖅᐳᑦ ᓄᖑᔪᐃᑦᑐᖅᓯᐅᕐᓂᐊᕐᓗᓂ ᓄᖑᔪᐃᑦᑐᒥᒡᓗ ᐅᔭᕋᖕᓂᐊᕐᓂᐊᕐᓗᓂ, ᐱᓗᐊᙳᐊᖅᖢᓂ ᓄᓇᒧᑦ, ᐃᒪᕐᒧᑦ ᓂᕐᔪᑎᓄᓪᓗ.
- ᓄᖑᔪᐃᑦᑐᖅᓯᐅᕐᓂᑦ ᓄᖑᔪᐃᑦᑐᒥᒡᓗ ᐅᔭᕋᖕᓂᐊᕐᓂᖅ ᐃᑲᔪᖅᑐᖅᑕᐅᑦᑎᐊᕆᐊᖃᖅᐳᖅ ᓄᓴᕗᒻᒥᐅᓂᑦ, ᐱᓗᐊᙳᐊᕐᕕᐅᓗᑎᒃ ᓄᓇᓖᑦ ᖃᓂᒃᓴᖅᑐᑦ ᓄᖑᔪᐃᑦᑐᒥᒃ ᐱᕙᓪᓕᐊᕝᕕᐅᔪᒥᒃ.
Uranium Reports
ᔪᕋᐃᓂᐊᒻ ᒥᒃᓵᓄᑦ ᓄᓇᕗᒥ
ᐅᖃᐅᓯᐅᓚᐅᖅᑐᑦ ᔪᕋᐃᓂᐊᒻ ᒥᒃᓵᓄᑦ ᓄᓇᕗᒥ – ᓇᐃᓈᖅᓯᒪᔪᑦ ᐅᓂᒃᑳᓕᐊᑦ
ᐅᖃᐅᓯᐅᓚᐅᖅᑐᑦ ᔪᕋᐃᓂᐊᒻ ᒥᒃᓵᓄᑦ ᓄᓇᕗᒥ – ᓯᕗᓕᖅᑎᐅᑉ ᐅᓂᒃᑲᐅᓯᖓ
Inuinnaqtun | French | English